Noticias | Agenda

O folclore despide as festas

Os actos de María Pita chegan ao seu fin coa Romaría de Santa Margarida, que ofrecerá obradoiros e concertos de música popular por toda a cidade
24-08-2017 23:57
0 votos
Actos na praza de Lugo, na Romaría de Santa Margarida do ano pasado. andy pérez

Actos na praza de Lugo, na Romaría de Santa Margarida do ano pasado. andy pérez

O baile e a música de raíz tomarán unha vez máis este fin de semana as rúas coruñesas coa Romaría de Santa Margarida. Como cada ano, e a xeito de peche das festas de María Pita, as prazas e avenidas da cidade encheranse de actuacións e obradoiros instrumentais e de reciclaxe que, ao igual que na edición do 2016, estarán vinculados á tradición popular galega. Os concertos das noites, a cargo de oito agrupacións como Radio Cos, Xacarandaina e Luar na Lubre, alongarán ata a madrugada cos seus cantos e pandeiretas a celebración no parque, que cederá durante o día o seu protagonismo a espazos máis descentralizados.

Os festexos comezarán a mañá do sábado e prolongaranse ata as derradeiras horas do domingo, con actividades que se distribuirán de forma temática pola cidade. A praza de Vigo, que pasará a chamarse do Baile, aglutinará durante o día 26 e desde ás 11.00. todos os actos relacionados coa danza, como os obradoiros de Mar Suárez, Carlos Xosé Vidal e Xisco Feijóo. A Asociación Cultural Donaire e Son D'Aquí, e a Agrupación Folclórica Aturuxo tamén estarán coas súas actuacións neste enclave o sábado, que contará ata media tarde con outros festexos simultáneos nas prazas de Galicia e Lugo.

Na primeira, bautizada como a praza da Música, os protagonistas serán a voz e os instrumentos tradicionais. De novo Son D'Aquí e Donaire, esta vez coas súas formacións de música, ofrecerán cancións galegas en dous concertos de preto de media hora de duración, entre os que se intercalarán o obradoiro de canto e pandeireta como o de Davide Salvado. O grupo de gaitas Xebre inaugurará ás 11.30 h. a zona como espazo da romaría coas súas melodías, e será imitado a primeiras horas da tarde polos Gaiteiriños da praza de Vigo e a sesión vermú da Alameda a cargo dos pandereteiros PanSenFron, unha das principais novidades deste ano. "A sesión vai enlazar todo o día, fará que non pare a música desde as 11.00 ata as 02.00", di un dos organizadores, Antonio Prado, sinalando "o récord" que supón a cifra de asociacións culturais representadas nesta edición, un total de 7.

Para os máis pequenos da festa, habilitarase a praza Miúda. Será o nome que reciba durante a xornada do sábado a praza de Lugo, que reunirá ata media tarde actividades dirixidas ao público infantil como o obradoiro de construción de instrumentos con materiais de refugallo de Xandobela. O coruñés Pablo Díaz realizará alí unha intervención ás 17.20, antes de trasladarse ao anfiteatro de Santa Margarida para dar o primeiro dos concertos da noite.

A Bandas das Crechas (21.20 h.), Riobó (23.00 h.) e Radio Cos (00.30 h.) serán o grupos que sigan a Díaz na sesión nocturna do sábado. O domingo será máis tranquilo, con presetacións literarias, firma de libros e contacontos nos soportais da Casa das Ciencias como parte da iniciativa Libros a Monte e música da man de grupos como Samarúas e Luar na Lubre, que pechará ás 22.00 h. uns festexos nos que non faltará ás 12.00 h. a tradicional actuación da Banda Municipal.

Compartir en Twitter
Compartir en Facebook