Noticias | Agenda

Fani Triana Maga, representa o 'show' 'Fantasía dos sentidos' no Forumáxico

"A maxia é un mundo moi machista, a muller sempre ten que demostrar que vale o dobre"

"A xente demanda outro papel para a muller no arte, pero non hai moitos magos masculinos que o apoien" - "Teñen que romperse moitos moldes, pero é difícil"
15-09-2017 00:00
1 voto
A ilusionista Fani Triana. carlos pardellas

A ilusionista Fani Triana. carlos pardellas

Humor, maxia e igualdade. Ese é o cóctel que Fani Triana propón na súa Fantasía dos sentidos, un espectáculo de mentalismo e ilusións que a maga representará este sábado ás 19.00 horas como parte do Forumáxico. Por medio de obxectos como cordas e cadeiras, e cunha alta dose de gargalladas, a ilusionista reivindicará o papel da muller no mundo da maxia a través dun show para público familiar, co que se converterá na primeira ilusionista en actuar no ciclo do Fórum Metropolitano.

- A primeira muller do Forumáxico. Como senta iso?

-É unha honra, aínda que o que me gustaría é que houbese moitas máis ilusionistas femininas a partir de agora, que se abran as portas.

- Como é a situación da muller na maxia?

-A maxia é un mundo moi machista e pechado para a muller, desde a vestimenta ata as cousas que se supón que pode facer un xénero ou outro por tradición. Sempre foi dirixido por homes, e nel eramos mulleres floreiro que se empregaba para ocultar os movementos do mago. Agora teñen que romperse moitos moldes, pero é difícil. A muller sempre ten que demostrar que vale o dobre para quedar ben situada.

- Ve sinais de apertura?

-Sinceramente, penso que a apertura virá da sociedade, non dos círculos máxicos. A xente demanda outro papel para a muller no arte, pero magos masculinos que o apoien non hai moitos.

- Esa igualdade a plasmou no show Maxia pola igualdade , sentíase na obriga de contribuír?

-Por suposto. Foi un espectáculo feito a propósito para demandar unha igualdade que non existe. Penso que calquera persoa que poida ser escoitada polos demais ten unha responsabilidade de dar unha mensaxe, e a mensaxe é que as mulleres podemos facer calquera cousa e facela ben sen ter por que ir en minifalda ou tacóns. De feito, facendo o show, atopamos un montón de anécdotas de desigualdade.

- Lémbrase dalgunha?

-A que máis recordo aconteceu o Día da Muller. Durante os primeiros trucos, un rapaz da primeira fila que non pasaba dos seis anos, gritou " Que pasa, pero esta maga non vai en bikini?". E aos 10 minutos, como o axudante era un home, o mesmo neno berrou se o rapaz non ía facer nada. Pensamos que xa temos moito feito, pero non está interiorizado pola xente.

- O ilusionismo ten que ser didáctico, logo?

-Non ten que selo, pero é moi fermoso que ensine liberdade, cultura e que existen cousas diferentes. O arte é como viaxar. No momento no que pagas unha entrada, ten que emocionarte, pero tamén ten que ser capaz de defender o que a sociedade necesita.

- Que ensina Fantasía dos sentidos ?

-No show amósase que non pasa nada se non gañas, que todos somos iguais, e que o sentido do humor pode con todo.

- Que papel ten que xogar o humor na maxia?

-Para min a maxia non se concibe sen humor. O público non vai resistir un espectáculo sen el.

- Como comezou vostede no mundo da maxia?

-Hai dez anos traballaba nun sector privado. Coñecín a unha persoa que levaba moitos anos dedicada ao ilusionismo, e comecei a aprender sen ningunha pretensión. Chegou un intre no que me dixo que lle axudara, ate que, ao final, estiven no punto de facer cousas pola miña conta.

- Como lembra ese primeiro espectáculo?

-Moi complicado. Agora a ilusión é que vou a pasalo ben, pero no primeiro espectáculo a tensión pódelle a un [ri]. Son moitas incógnitas na ecuación.

- Que seguirá ao espectáculo do Forumáxico?

-Agora estou a preparar outros tres, e case que me vou lanzar ao cuarto ao mesmo tempo. É algo habitual na maxia, e moi bo, porque pon as pilas e fai que te recicles. E reciclarse, en todos os sentidos, sempre é beneficioso.

Compartir en Twitter
Compartir en Facebook