Noticias | Agenda

Rock bravú pola maioría de idade

Os Diplomáticos de Monte Alto súmanse ao festexo do 18 aniversario da Mardi Gras coa súa primeira actuación oficial na sala, na que farán soar os grandes clásicos da súa traxectoria
10-11-2017 00:57
1 voto
Os Diplomáticos de Monte Alto, con Xurxo Souto no centro. víctor echave

Os Diplomáticos de Monte Alto, con Xurxo Souto no centro. víctor echave

O rock bravú máis representativo da cidade encherá hoxe a noite en Mardi Gras cos Diplomáticos de Monte Alto. O grupo, que nacía a comezos dos noventa para reivindicar a música en galego e o barrio coruñés no que se creara, unirase ao ciclo de concertos co que a sala festexa este mes o seu 18 aniversario cunha sesión protagonizada polos seus grandes clásicos, entre os que non faltarán as pezas vinculadas á Coruña. Temas de traballos como Arroutada pangalaica, Avante toda! e Capetón soarán ás 22.00 horas na primeira actuación oficial da banda completa no local, coa que o grupo quere conmemorar todo o vivido alí ao longo da súa carreira.

"Queremos devolverlle o cariño á sala cunha xornada de rock bravú coruñento, chamámolo un venres apoteose", conta o vocalista do grupo, Xurxo Souto. Dos preto de 20 artistas que subiron e subirán este novembro ao seu escenario, Os Diplomáticos foron os primeiros aos que chamaron desde a sala, cuxa traxectoria ata a maioría de idade entrelázase coa propia historia do grupo. "Antes era unha bodega, Adegas Villarreal. Alí formamos a peña Urkiola", explica o músico facendo memoria. A presentación no 98 dun libro dedicado a Os Diplomáticos - Non temos medo, de Rodri Suárez- e Xangai Km.0, un proxecto baseado no tren que levaba aos galegos a Barcelona e que o grupo quixo honrar o ano pasado, son outras das lembranzas vinculadas á sala que Souto garda na memoria. Entre elas, e ocupando un oco especial, atópase o antigo entrenador do Deportivo, Arsenio Iglesias, co que o grupo se xuntou fai case tres décadas. "Houbo un momento no que o fútbol viviu a revolución dos humildes e convertiuse nun referente grazas a el, ao que lle dedicamos o noso primeiro disco. Lembro a Arsenio contentiño, recollendo o álbum que lle entregabamos en Adegas Villarreal? Está construída nun eixo magnético da rúa da Torre, é normal que pasen cousas así de extraordinarias", declara, incluíndo no radio de sucesos excepcionais a todo Monte Alto.

Reivindicar o seu valor e a capacidade creativa dos habitantes dun barrio "teoricamente esquecido, pero cargado de vida" foi desde os comezos a intención de Os Diplomáticos, que desde a súa xuntanza polo 20 aniversario da formación, non lograron volver deixar o escenario que abandonaran no 2005. Sobre el, continúan tocando rock bravú, o xénero que naceu con eles, e co que demostraron que o galego tamén servía para a música máis con caña. "Dixéronnos que era imposible triunfar no rock cantando en galego e reivindicando a Monte Alto, pero desde a base pódese inventar o mundo", conclúe.

Compartir en Twitter
Compartir en Facebook

Sorteo

Disfruta del concierto de Cantajuego en el Palacio de la Ópera, el 19 de noviembre a las 12.30. Sorteamos 2 entradas y podrás conocer a los cantantes en un 'meet & greet'.
¡Participa!

Encuentra los eventos de