Noticias | Agenda

Unha loanza á música popular

Os veciños de Agra do Orzán celebran esta fin de semana as súas festas, nas que haberá foliadas e espectáculos para os máis pequenos
09-09-2018 23:26
0 votos
Unha das actuacións da FoliAgra do ano pasado na Praza das Cunchiñas. carlos pardellas

Unha das actuacións da FoliAgra do ano pasado na Praza das Cunchiñas. carlos pardellas

A música de raíz farase esta fin de semana co barrio de Agra do Orzán, que encherá os seus bares e rúas coas algueiradas e os espectáculos infantís da súa FoliAgra. Os festexos, trasladados a este mes por mor do mal tempo previsto para a súa programación en xuño, terán como sede principal a Praza das Cunchiñas, pola que pasarán grupos como Leirabuxo, De Outra Margem ou o show para xente miúda de Peter Punk.

A Foliada das Tabernas, un dos pratos fortes da celebración, será a que abra o programa. A iniciativa percorrerá desde as 12.15 horas os locais de hostalería da zona, na que os intérpretes compartirán por cuarto ano consecutivo e ata as 15.00 horas os seus cantos e bailes populares. "Irán de bar en bar, invitando a participar á xente, que pode acompañalos no seu camiño", explica desde a Asociación de Veciños Agra do Orzán un dos organizadores, Ricardo Seixo, sobre a ruta.

Seguíndolle de preto estará o espectáculo para nenos do pallaso Peter Punk, que terá lugar ás 17.00 horas. O show do cómico, un dos máis destacados de Galicia, encherá de humor e gargalladas a Praza das Cunchiñas, na que desembocarán os pasarrúas de Birloque Gaiteiros. O seu repertorio folk comezará a sonar tamén ás 17.00 horas, coa Ronda de Outeiro como punto de partida. Fuente Álamo, xusto ao outro lado do bloque, será desde onde iniciará o seu percorrido a Escola Sementeira, que levará ata a Ronda de Nelle os seus ritmos de raíz.

Con estas marchas populares, os organizadores pretenden "que o barrio sinta os aires de festa", así como animar aos veciños a unirse á foliada aberta que lle sucederá ás 19.00 horas. Nela, unha decena de agrupacións amenizarán o enclave con música e danza, coa que se porá o peche á primeira xornada de xolda no Orzán. "Os artistas cantarán e bailarán, pero poderá tocar calquera que se achegue co seu instrumento", apunta o coordinador, que sinala a foliada folk do domingo como o acto máis forte do programa.

Polo menos "500 personas" reuniranse para gozar deste acto, que terá como protagonistas ás 20.00 horas aos músicos de Leirabuxo e De Outra Margem. Antes, ás 17.00 horas, será a quenda dos máis cativos con Odaiko, que porá a bailar aos nenos e nenas do barrio coas súas melodías pensadas para toda a familia. "Tiñamos en proxecto levar grupos de monicreques aos colexios, e facer proxeccións educativas no Ágora, pero o diñeiro é o que é e, mentres non aumente, témolo complicado", lamenta Seixo, que agarda que o festexo "vaia consolidándose" co tempo grazas ao traballo da asociación.

A plataforma veciñal leva 5 anos recuperando as festas da zona, que sufriron o esquecemento durante varios anos. "Houbo épocas nas que se facían festas con orquestras, e tense pechado ata a Ronda de Outeiro, pero logo fóronse esmorecendo e moitas veces non se fixo nada", explica o coordinador, que presume de levar 40 anos vivindo no barrio.

A antigas verbenas que acollía convertéronse hoxe na FoliAgra nunha forte aposta polo patrimonio cultural galego, no que o baile e a partitura tradicional son as estrelas do cartel. Rachar cun modelo de festas pensado "só para mirar", e impulsar unha música propia "totalmente desacordada" foron as metas que se fixou a plataforma veciñal, que reclama un maior respaldo por parte do Concello e dos comerciantes para ampliar as súas festas. "Queríamos incorporar músicas de outros países. Este ano tiñamos apalabrados a Son de Camagüey, pero non puido ser porque non se financiaba", conta Seixo, que asegura que non atopou nos comercios "interese por mellorar a celebración do barrio". Unha carpa para realizar a cuberto as actividades no caso de que chova é outra das peticións ao goberno local que fai o coordinador, que mantén, malia as dificultades, o optimismo sobre os seus festexos. "Se puidéramos facer toda unha semana de festa estaríamos encantados. Nós a esperanza a temos sempre, vivimos diso", engade.

Compartir en Twitter
Compartir en Facebook

Sorteos

El próximo sábado, a las 20.30, se disputa el Deportivo - Real Oviedo y en LA OPINIÓN te invitamos a Riazor. Responde a nuestras preguntas y gana 2 entradas en Tribuna para ver el partido. Sorteamos 2 premios.

Les Luthiers visitan A Coruña, del 27 de noviembre al 1 de diciembre, y en LA OPINIÓN te invitamos a  disfrutar del espectáculo 'Viejos Hazmerreíres' en el Palacio de la Ópera.

Disfruta del espectáculo 'HISTORY OF ROCK' en Palexco el viernes 23 de noviembre. Sorteamos 18 entradas.

Encuentra los eventos de